قالوا لي اتعلم
من كل درس صعب ومر
ومن حلم خيالي كان كداب
وكل ما الأيام بتمر
بنسى الدرس
تعدي شهور تِضْحَى سنين
وأعافر لجل ما أكمل يوم
للآخر
وبين كل وقت وحين
أقول لنفسي قوم…واجه
ساعات مقدرش
بكلمه أوقات
وأناجيه جوايا
يا رب…..
وأسكت
ملاقيش دعوة توصفني
بس بحتاجه
يكون جنبي
وقت الفراغ والتيه
ووقت العمى
ووقت الثقة والأمل
ووقت الاستسلام للحلم
ووقت احتدام البأس
حين اليأس
ووقت الجفا والحزن
ووقت ووقت ووقت…
أناجيه لعله يسمع لي
ويقولوا لي
دايما سميع عليم
على راسي بس مبيردش
أو يمكن رد بس مش سامع
لا أكونش طرشت؟
ولا الشمع زاد وغطى؟
ولا الأصوات الي في دماغي
مبتسكتش؟
وصوته وسطهم تايه؟
ولا سابني ومبيردش؟
باينله يأس مني
وأنا يائس، ولسة بزق
في نفس مبيقوملهاش قومة
وأفكار في دماغ دوشة
محكومة
بقفل مصدي
مالوش مفتاح
وقلب بيدمي
مالوش جرَّاح
وأمل معشش مبيدبلش
وخوف مغطي كل جدار
وأقول حتعدي، زي ما تعدي
ودرس يفيدني، ولا أكررهاش
وتعدي شهور تِضْحَى سنين
وبين كل وقت وحين
بنسى الدرس